Tuesday, December 23, 2008

بما إني..!


بما إني..
أسير دمعي اللي مش نازل
وحمل الكون أنا شايل
ولسه الحزن جوايا..
ماليني الخوف!!
بما إني..
بدقة قلبي جوايا
تألمني
وثانية كمان ..تعلمني
وأسيبها كمان..
تصبرني..
وتحييني..
تقدرني!!
بما إني..
كما النملة في جحر كبير
تسافر .. كي تشوف النور بقلب كسير
وتشقي من العمل كأجير
وتسعي كأب عنده ضمير..
لكن برضه الحياة معانداه
وقافلاله الطرق تقفيل!!
بما إني..
تعبت خلاص من التعليل
ومش قادر علي التمثيل
وكل ما فيا حاولته.. كتير وقليل
ويوم ورا يوم مافيش فيادة .. أسايا طويل
بما إني..
كلامي كتير
بما إني..
في أيامي.. كأني أسير
بما إني..
خلاص خلصت جميع حيلي بأيامي
ومش باقي سوي إني..
لكن لحظة...
يبان إنه.. كده في سكة قدامي
...
ألملم كل أقلامي
أحط معاها أحلامي
وأشيلها لحد ما أوصل.. لمحرابي
وكان آخر نفس فيا..
رفعت إيديا من تاني
وراجع ليك
عاوز أشكي
عاوز أحكي
أخاف أنطق .. من الرهبة.. أقوم أبكي
ودمعة من ورا دمعة.. تريحني
تنسيني هموم عقلي.. وتُجبُرني
ومن تاني..
إذا بيا أتوه منه..
وأشتاقله..
فأرجعله..
وأتمني لو الفرقة ماتبعدناش
لو الدنيا ماتاخدناش
لو أقدر أعيش دموعي هناك ماجففهاش
وأتمني وأتمني...
ونفسي كمان..
لكن يللا..
بما إني..
هكمل قصتي دايما...
مابين ألمي.. وبر أمان
بما إني... هاعيش إنسان
وأتمني أموت... إنسان!

8 comments:

أبو نضال said...

"بما إنى"

حكىٌ لكفاح الإنسان
تحكى أحوال تقلبه
ما بين كثير الألوان
و حياة لم تخلُ من الألم
قد خرجت منه الأنسام
و جمال فى الروح عليل
داوته صحائف رسام
يرسم بطيوف من أمل
أجمل ما فيها الإنسان!!


"هي صفحتي البيضاء.. قصة حالمٍ.. وحروفها ألوان لوحتي الجميلة.. ووضعت عنوانا لها.. أسميتها.. روح الأمل"

:)

رائعة كالعادة :)

آسو الحياة said...

بما انى هاعيش انسان0000وأتمنى أموت )انسان) رائعة أيها الامير الصغير 000هل من أبداعات حضرتك؟؟؟؟00ودمت بخير

Sanaa basha said...

وربى ...باحلف بربي...دى اروع حاجة قريتها لحد تلوقتى...بما انى ...انسان

أيمن طلبة said...

جميلة يا ولد.
معاني عايشة جوانا يابنخبيها أو نستخبى وراها
شوية ضبط لبعض الأبيات وبعض أخطاء الإملاء وإلا فهي جميلةوفيلسوفة مثلك أيها الفيلسوف الصغير:)

عبدو بن خلدون said...

بما إني
ولكني
غصب عني
أرجعني
أسمعني
وأسيب رسمي القريب
أودعني

عمرو طموح said...

أبو نضال،

يابني حرام عليك، كده انت بتخللي الناس تدخل تقرأ تعليقاتك مش تقرأ التدوينة :):)

راشعة بحق.. دم مبدعا

==
أشووو الحياة،
يعني.. بما إنه العبد لله هو اللي كتبها، فهي مما ألهمنيه الإبداع :)
دمت بألف خير

===
سناء باشا، :):)
مش قوي كده يعني يا باشموهندس.. ربما تقاربت حالة الوجدان ومعارف الجنان فلسفات اللسان... فوصل البيان إلي أعماق الإنسان :):)

===
خالي،
يا باشا المدونة نورت والله.. يااااااه
طيب ما تفيض علينا من بعض ما عندكم من الحكمة و المعرفة.. إيه اللي محتاج يتظبط؟؟ :):)

==

عبدو،

اطلعلي بره!!

بما إني... زي ما قولتلك قبل كده.. فانت لازم.. زي ما قولتلك ساعتها برضه

كلمات said...

جزاك الله خيرا عنها كنت بجد محتاجة حاجة زيها دلوقتي وبجد أثرت فيه جدا ربنا يجعلها في ميزان حسناتك

صوت من الاعماق said...

elsara7a msh la2y 7aga 22olhak
3la kalamk el7lw hnbarek
bs ana nfsy awsal llm7rab
mn bo3do 3anny..7asso saarab
w 2deeny kol ma 22arab 2b3ed
w lma bla2y nafsy fe mkany bs3ad
3shan mab3edtsh ab3ad w ab3ad